६ जेठ, ललितपुर । गोपाल योञ्जनको २०औं स्मृति दिवसको पूर्वसन्ध्यामा अलग आर्ट हबमा नयाँदेखि स्थापित कलाकारहरु भेला भए । सबैले सङ्गीतकार गोपाल योञ्जनलाई स्मरण गर्दै उनीद्वारा सङ्गीतबद्ध गीतहरु प्रस्तुत गरे ।
कार्यक्रममा मण्डल साम्पाङ, पार्वती राई, आभा मुकारुङ, झुमा निरौला, दिपा लामा, विनोद राई, सुनिता थेगिम, कर्ण लामाको साथमा अलग आर्ट हबका विद्यार्थीहरुले गोपाल योञ्जनद्वारा सङ्गीतबद्ध ‘आफ्ना आफ्ना’, ‘जीवनदेखि धेरै’, ‘गल्ती हजार’, ‘मेरो जोवन लैजाऊ’, ‘हिमालसरी म अग्लिरहेछु’, ‘देशले रगत मागे’, ‘बनेको छ पहराले’ बोलका गीतहरु प्रस्तुत गरेका थिए ।कलाकारहरुलाई हार्मोनियममा मण्डल साम्पाङ, तबलामा यमकुमार समाल, बाँसुरीमा रमेश खड्का र गिटारमा अब्राहम समले साथ दिएका थिए ।
