काठमाडौं उपत्यकामा ७ दिन गाडी चलाउन नपाइने

काठमाडौं उपत्यकाभित्र रहेको काठमाडौं, ललितपुर र भक्तपुर जिल्लामा बैशाख १६ गतेदेखि ७ दिनसम्म सार्वजनिक तथा निजी गाडीहरु चलाउन नपाइने भएको छ ।

बिशेषगरि कोभिड नियन्त्रणलाई ध्यानमा राखि काठमाडौं, ललितपुर र भक्तपुर जिल्ला प्रशासन कार्यालयले वैशाख १६ गते विहान ६ बजेदेखि वैशाख २२ गते मध्यराति १२ बजेसम्मका लागि गाडी चलाउन रोक लगाउने निर्णय गरेको हो ।

तर, अत्यावश्यक सामान बोकेका ढुवानीका सवारी साधन, बिरामी तथा कुरुवा (बढीमा २ जना) बोकेका एम्बुलेन्स, स्वास्थ्यकर्मी तथा सुरक्षा निकायले प्रयोग गर्ने सवारी साधनलाई काठमाडौं उपत्यका प्रवेशमा रोक लगाइएको छैन ।

एम्बुलेन्स, खानेपानी, स्वास्थ्य, खाद्यान्न, तरकारी, फलफूल, दूध तथा दुग्धजन्य पदार्थ, बैंक, वित्तिय संस्था, दुरसंचार, इन्टरनेट, क्वारेन्टिन, आइसोलेसन, फोहोरमैला व्यवस्थापन लगायतका ढुवानी तथा यातायातका साधनमा संचालन गर्न पाइने तीन जिल्लाको निर्णय छ ।

सो अवधिभर सार्वजनिक एवं निजी सवारी साधन संचालनमा रोक लगाएको हो । यस्तै यातायात, निजी व्यवसायिक प्रतिष्ठान, अत्यावश्यक सेवाबाहेकका सबै क्षेत्र बन्द गर्ने तीन जिल्लाको संयुक्त विज्ञप्तिमा उल्लेख छ ।

Facebook Comments