उदयपुर, ४ असार । असार १४ गने हुने स्थानीय निर्वाचनको लागी उदयपुरमा मनोनयन दर्ता प्रक्रिया शान्तिपूर्ण रुपले आईतवार सम्पन्न भएको छ । चार नगरपालिका र चार गाउँपालिका रहेको जिल्लामा आठ स्थानीय तहका ३ सय ९१ पदका लागि भएको मनोनयन दर्ता कार्यक्रम शान्तिपूर्ण रुपले सम्पन्न भएको प्रमुख निर्वाचन अधिकृतको कार्यालयले जनाएको छ । कार्यालयको अनुसार साँझसम्ममा सबै ठाउँमा मनोनयन दर्ताको कार्य सम्पन्न भएको र रातीसम्ममा सम्पूर्ण नामावली तयार हुनेछ । विभिन्न राजनीतिक दल तथा स्वतन्त्र उम्मेदवारहरुले उम्मेदवारी दर्ता गराएका हुन् ।
चारवटा नगरपालिकामा नै प्रमुख प्रतिष्पर्धी तीन दलको रुपमा रहेका नेपाली कांग्रेस, नेकपा एमाले, नेकपा माओवादी केन्द्र उदयपुरले नाराजुलुस्, बाजागाजासहित मनोनय दर्ता गराएका थिए । सदरमुकामसमेत रहेको त्रियुगा नगरपालिकामा नेपाली कांग्रेसको तर्फबाट मेयरमा बसन्त बस्नेत र उपमेयरमा देबी चौधरीेले मनोनयन दर्ता गराएका छन् । नेकपा एमालेले मेयरमा बलदेव चौधरी र उपमेयरमा गीता रेग्मीले मनोनयन दर्ता गराएका छन् भने नेकपा माओवादी केन्द्रको तर्फबाट मेयरमा किरण राई र उपमेयरमा गीता खड्का कार्कीले मनोनयन दर्ता गराएका छन् ।
त्यसैगरी कटारी नगरपालिकामा प्रमूख प्रतिष्पर्धी तीन दलहरु मध्ये नेपाली कांग्रेसले मेयरमा ज्ञानेन्द्रमानसिंह राउत, उपमेयरमा निर्मला कार्कीले मनोनयन दर्ता गराएका छन् । नेकपा एमालेको तर्फबाट मेयरमा ज्ञानेन्द्र श्रेष्ठ (काजी) र उपमेयरमा भीमकुमारी राउतको मनोनयन परेको छ भने नेकपा माओवादी केन्द्रको तर्फबाट मेयरमा कृष्णप्रसाद बराल (केपी) र उपमेयरमा मिना कोइरालाको मनोनयन परेको छ । 
चौदण्डीगडी नगरपालिकामा नेपाली कांग्रेसको तर्फबाट मेयरमा निर्मल राई (काजी) र उपमेयरमा रीता चौधरीको मनोनयन परेको छ । नेकपा एमालेको तर्फबाट मेयरमा नरेन्द्र राउत र उपमेयरमा कान्ता राईको मनोनयन परेको छ भने नेकपा माओवादी केन्द्रको तर्फबाट मेयरमा कुमारसिंह कार्की र उपमेयरमा मायादेवी राईको मनोनयन परेको छ । 
बेलका नगरपालिकामा नेपाली कांग्रेसको तर्फबाट मेयरमा अकोश कार्की र उपमेयरमा दिपा राईको मनोनयन परेको छ । नेकपा एमालेको तर्फबाट दुर्गा थापा र उपमेयरमा राजकुमारी चौधरीको मनोनयन परेको छ भने नेकपा माओवादी केन्द्रको तर्फबाट मेयरमा रमण भट्टराई र उपमेयरमा गंगासरी राईको मनोनयन परेको छ । 
चार गाउँपालिकामा पनि प्रमुख प्रतिष्पर्धीको रुपमा तीनै दलहरु कांग्रेस, एमाले र माओवादी केन्द्र रहेका छन् । उदयपुरगडी गाउँपालिकामा कांग्रेसको तर्फबाट अध्यक्षमा जीतबहादुर खड्का र उपाध्यक्षमा बिमा राईको मनोनयन परेको छ । एमालेको तर्फबाट अध्यक्षमा मानबहादुर मगर र उपाध्यक्षमा सानु कार्की राउतको मनोनयन परेको छ भने माओवादी केन्द्रको तर्पmबाट अध्यक्षमा देब गिरी र उपाध्यक्षमा निर्मला मगर रहेका छन् । 
रौतामाई गाउँपालिकामा कांग्रेसको अध्यक्षमा भूपेन्द्र थापा र उपाध्यक्षमा धनकुमारी मगरको मनोनयन परेको छ । एमालेको अध्यक्षमा गजेन्द्रबहादुर खड्का र उपाध्यक्षमा कुमारी ज्यू ठकुरीको मनोनय परेको छ भने माओवादी केन्द्रको तर्फबाट अध्यक्षमा विरेन्द्र मगर रहेका छन् । माओवादी केन्द्रसंगको तालमेलमा संघीय समाजबादी फोरमको तर्फबाट उपाध्यक्षमा हस्तशोभा राईको उम्मेदवारी परेको छ । 
सुनकोशी गाउँपालिकामा कांग्रेसको अध्यक्षमा पुष्पलाल राई र रमिला राईको उम्मेदवारी परेको छ । एमालेको अध्यक्षमा भलराज राई र उपाध्यक्षमा लक्ष्मीदेवी कार्कीेको मनोनयछन परेको छ भने माओवादी केन्द्रको अध्यक्षमा मेजर राई (मिजास) र उपाध्यक्षमा विना राईको मनोनय परेको छ । ताप्ली गाउँपालिकामा कांग्रेसको अध्यक्षमा डाकबहादुर ठकुरी र उपाध्यक्षमा धना मगरको मनोनयन दर्ता भएको छ । एमालेको अध्यक्षमा उद्धवसिंह थापा र उपाध्यक्षमा कमला माया राईको मनोनयन परेको छ भने माओवादी केन्द्रको अध्यक्षमा ढुंगाराज राई र उपाध्यक्षमा कृतिमाया राईको मनोनयन परेको छ । मनोनयन दर्ता कार्यक्रमको समयमा कतै पनि अप्रिय घटना तथा चुनावविरोधी गतिविधि नभएको जिल्ला प्रहरी प्रमुख एसपी नरबहादुर केसीले बताए । उनले नेपाल प्रहरी, सशस्त्र प्रहरी र म्यादी प्रहरी परिचालन गरी कडा सुरक्षाको व्यवस्था मिलाईएको बताए ।