उदयपुर । नेपाली सिनेजगतको ख्यातिप्राप्त कलाकार दयाहाङ राई सहित अन्य एक दर्जन कलाकारहरु गाईघाट आउने भएका छन् । आउँदो १९ देखि २१ गतेसम्म गाईघाटमा हुने ‘किरात राई कलाकार संघको पाचौं राष्ट्रिय सम्मेलन’मा सहभागी हुन अभिनेता राई सहित अन्य कलाकारहरु आउन लागेको हो ।
किरात राई कलाकार संघद्वारा आयोजित एक पत्रकार सम्मेलनमा अभिनेता राई सहित एक दर्जन चर्चित कलाकारहरु आउन लागेको संघको महासचिव राई नबिनले बताए । महासचिब राईका अनुसार नायक दयाहाङसँगै कालजयी लोकगायक शम्भु राई, लोक तथा जनवादी गायक जितेन राई, भिषण मुकारुङ, रेवत राई लगायतको कलाकारहरु आउने छ । त्यसैगरि चर्चित गायिकाहरु पार्वती राई, सत्यकला राई, सुशिला राई आउने भएको छ । कार्यक्रममा दयाहाङसहितको कलाकार टोलीले विशेष प्रस्तुती राख्ने आयोजकले जनाएको छ ।
सम्मेलनलाई भब्य र सभ्यरुपमा सम्पन्न गर्न बिभिन्न उपसमितिहरु गठन गरी प्रचारप्रसार तथा व्यवस्थापन तीब्र पारिएको र लगभग तयारी पूरा भएसकेको आयोजकले जनाएको छ । ३ दिनसम्म चल्ने सम्मेलनमा देशभरका किरात राई कलाकारहरुको प्रतिनिधित्व हुनेछ । पहिलो दिन उद्घाटनपछि पर्यटनमैत्री विविध सांस्कृतिक कार्यक्रम गरिने छ भने त्यसपछिका दुईदिनको बन्दसत्रले संघको नयाँ नेतृत्व चयन गर्ने सचिव राईले बताएका छन् । कार्यक्रम गाईघाटको पिपलचौकमा हुने छ ।
